強積金 - 預設投資策略

不論一個人幾抗拒投資, 「強積金」亦係每個打工仔都會接觸, 而且亦關乎到我地10%人工。剛好積金局2017年4月1日推出「預設投資策略」, 筆者亦聽過積金局簡介, 就來總結、評論一下。

預設投資策略(DIS)係積金局推出的強積金計劃, 其特點有三個:
1) 隨著年齡(50歲後)自動降低風險
2) 收費設上限 (管理費 0.75% & 經常性開支 0.2%)
3) 環球股票市場

隨年齡自動降低風險
DIS由兩個計劃組成: 核心累積基金(較高風險) + 65歲後基金 (較低風險)
前者是由60%環球股票 + 40% 債券組成; 後者由20%環球股票 + 80% 債券組成
50歲前, 會100%投資較高風險、較高回報的核心累積基金; 50歲後, 會漸漸將資產轉移到 65歲後基金, 達致最終65時有100% 較低風險、較低回報65歲後基金。

這個概念很好, 特別是幫助一班無興趣做功課、了解投資的市民。畢竟現時強積金可以揀既Plan很多很繁複, 沒有足夠財務知識往往出現「選擇困難」。 現在唔洗煩, 揀DIS就最方便。
其次, 是確保年輕時有足夠進取去賺取回報, 臨退休時又有足夠穩健去保住資產。

收費設上限
筆者認為這是DIS最正的地方。現時強積金唔係唔賺錢, 而係收費太高, 大大降低了回報。
舉例, 現時很多強積金計劃都有1.5- 2%的收費。 簡單D講, 你有$100資產, 今年雖然賺左$3, 但要比$2 基金佬, 得返$1落自己袋; 第2年蝕左$5, 仍然要比$2基金佬。
明白了嗎? 賺又賺少左好多, 蝕又蝕多左, 強積金最失敗唔係冇回報, 而係收費高 (對比起自己投資, 一般收費佣金只有約0.25%)。

DIS 設有收費上限, 而且受積金局監管(即係法例要求!), 就大大降低左強積金的弊處。 筆者比較過自己現在強積金公司的收費, 即使是收費最低的保本基金, 收費也要0.8%。 固然之, DIS的0.75%收費真係唔錯, 非常划算。調查亦顯示, 強積金回報率與其收費沒有關係, 即係收費愈高, 不代表回報愈高, 往往會表現更差。所以聰明既你, 識揀啦!

環球股票市場
這有好有唔好。唔好處係會受其他國家的壞經濟影響 (e.g. 歐債危機), 而一般廣泛市民係對其他國家的經濟無好大觸覺, 反而香港股市如何、經濟好唔好, 即使你唔係投資者都一定略知一二。
好處主要有二: 一是分散投資降低風險, 當其他國家經濟/股市好時, 可以帶動你既強積金一齊升! 而最近美股都跑羸港股 (美股道指已突破21,000點! 想當年香港應該要有返30,000點咁上下先打和, 但香港得23,000 ~ 24,000點); 二是令投資者可以接觸海外市場。一般投資者會集中返香港的股市和物業, 因為手續麻煩好少會投資海外資產, 而強積金就係一個最簡單方便既渠道去投資海外市場。

總結
預設投資策略(DIS) 不一定是最佳的強積金計劃, 卻是最唔洗煩選擇、收費保證低、回報絕對比保本高。 如果你唔係留意開股市、有一定財務知識的人, 筆者也是建議揀DIS。

揀DIS需要做D咩?
有2款人, 每人要做既野都唔太同。
1) 新入職 / 之前強積金無選擇任何計劃
即使你唔做任何野, 都會自動被揀DIS, 當然你有權Say NO (That's why 佢叫預設-Default)

2) 現職, 之前有自己揀過強積金計劃
你需要主動聯絡受託公司更改計劃, 如果你強積金有網絡Account, 就可以自行更改。

追求更高回報、DIS的進階版?
筆者可以提供兩個選擇, 但需要自己做少少功課。
一是直接投資核心累積基金(同樣有收費上限), 再按自己需要搭配其他計劃 (E.g. 香港股票、指數追蹤), 以制訂最適合自己的Portfolio
二是留意買入賣出價, 以低買高賣的概念,
i) 在大市異常興旺時賣出部份/大部份股票基金, 改為債券/保本基金 (高賣), E.g. 2015年港交所突破$300既時期。
ii) 在大市衰落時將債券/保本基金轉為股票基金 (低買) E.g. 金融海嘯時期
當然, 實際操作可以分段賣出/買入, 亦需要一定財務知識、涉及一定風險, 或者問下身邊既投資達人 (Not me)

希望大家既強積金都有不錯回報, 可以舒緩一下退休生活 (想單靠強積金退休是妄想...)

想了解多D可以瀏覽積金局網頁, OR網上宣傳短片:
https://www.youtube.com/watch?v=rW7oW2Xqys0&feature=youtu.be